Fiskur

Sjáir þú fiska í tæru vatni eða sjó muntu bráðlega fá góð fækifæri til að bæta fjárhaginn.

Ef þú rennir fyrir fisk en hann bítur ekki á mun eitthvað fara úrskeiðis í áætlunum þínum. Því stærri fisk sem þú veiðir í draumi því meiri ávinning hefur þú í vöku.

Að sjá fisk blaka uggunum er merki þess að áhyggjum verði af þér létt svo um munar.

Dauðir fiskar á landi eða sjó eru fyrir vonbrigðum og mótlæti.

Fiskát eða matreiðsla á fiski þykir gott tákn.

Fiskinet með miklum fiski í, merkir ábata en tap ef enginn er fiskurinn eða netið rifið. Einnig getur rifið fiskinet táknað að þú nýtir ekki nægilega vel þau tækifæri sem þér bjóðast, kæruleysi þitt er of mikið.

Að horfa á aðra veiða er fyrir því að þú lærir eitthvað nýtt eða öðlast einhverja þá vitneskju sem mun nýtast þér mjög vel síðar.

Að beita öngul í draumi er fyrir ástríðufullu ástarævintýri, ef ekki dreymandans sjálfs, þá einhvers mjög nákomins.

Að sjá laxa eða silunga eða einhverja sjaldgæfa fiska er fyrir upphefð og góðum félagsskap.

Að dreyma fisk í höndum sér sem spriklar sig í burtu er viðvörun um að þú munir þurfa að stilla kröfum þínum í hóf og draga saman seglin. Það er einkennilegt en siginn fiskur eða daunillur er merki um skyndilegan fjárhagsbata.

Sjá einnig